Representasyon ng Pagkalalaki sa Pelikulang Bakbakan ni FPJ

Abstract

Nakalunan ang pag-aaral na ito sa representasyon ng mga bidang lalaki sa ilang piling pelikula ni Ronald Allan Poe Kelly, o mas kilala sa pangalang Fernando Poe, Jr. (FPJ). Mula sa masinsin na pagbasa sa mga pangunahing bida, nakabuo ng mga bagong kategorya sa representasyon ng mga bidang lalaki sa pelikulang bakbakan. Natukoy ang infantilisado, trigger-happy at sadistang bida na patuloy na nilikha sa mga pelikula ni FPJ. Maituturing na bahagi ng kultural na pag-aaral ang pananaliksik kung saan ginamit ang palitan ng mga dayalogo at eksena sa pelikula sa paglikha ng representasyon ng pagkalalaki. Upang bigyang-katuturan ang mga kategoryang nalikha sa panunuri, kinailangang ilapat ito sa mas malawak na konteksto ng usaping panlipunan na nasa anyo ng biswal na kultura. Ginawang batayan ang mga nalikhang kategorya upang basahin ang proyektong Metro Guwapo ng Metropolitan Manila Development Authority (MMDA) sa panahon ng pamumuno ni Bayani Fernando. Bukod dito, ginamit din ang nalikhang kategorya upang basahin bilang politikal at kultural na teksto ang matrimonya ng estado at militar sa panahon ng dating Pangulong Gloria Macapagal-Arroyo. Sa huli, ginamit na batayan ng pagbasa ang nalikhang representasyon ng pagkalalaki sa isang larawan ng dating U.S. Ambassador sa Pilipinas na si Kristie Kenny habang nagbibigay ng panauhing pananalita sa mga taga-Mindanao na pangalagaan ang Lake Lanao.